Ynglŷn â Diwylliant a Hinsawdd Cymru

Mae Diwylliant a Hinsawdd Cymru yn ymateb i argymhelliad adroddiad ymchwil Llywodraeth Cymru am y sector diwylliant yng Nghymru a’r argyfyngau hinsawdd a natur y “dylai Llywodraeth Cymru a rhanddeiliaid y sector diwylliant feithrin rhwydwaith o gymheiriaid sectoraidd ymreolaethol i ganolbwyntio ar hinsawdd a natur yn y sector diwylliant yng Nghymru”. Mae’n cefnogi cyflawni Uchelgais 16 o Flaenoriaethau Diwylliant Llywodraeth Cymru, sef i’r sector diwylliant ddangos “arweinyddiaeth a chydweithio yn ei ddulliau gweithredu ar gyfer datblygu cynaliadwy, meithrin gwydnwch, a mynd i’r afael â’r argyfyngau hinsawdd a natur”, ac mae wedi’i ategu gan Ddeddf Llesiant Cenedlaethau’r Dyfodol.

Lansiwyd y fenter gyda dwy sesiwn rhwydwaith peilot a fynychwyd gan 112 o bobl ym mis Mawrth 2026, a gyflwynwyd mewn partneriaeth â Chelfyddydau Cynaliadwy Cymru. Bydd gweledigaeth, cenhadaeth a gwerthoedd ar gyfer y rhwydwaith yn cael eu datblygu ar y cyd ochr yn ochr â rhaglen o weithgarwch pellach yn ystod 2026-27.

Cefnogir y rhwydwaith gan y wefan hon sy’n darparu man canolog i unrhyw un sy’n gweithio yn y sectorau diwylliannol a threftadaeth yng Nghymru ddod o hyd i hyfforddiant ac adnoddau, digwyddiadau, astudiaethau achos, a gofod fforwm ar-lein i rannu syniadau a chydweithio ar weithredu ar yr hinsawdd a natur.